Group: Lingva helpejo


Ĉu "ripozigi" estas sinonimo de "apogi" ?


KaGu:-}
By KaGu:-}
December  6, 2012 - 9 komentoj - 206 vizitoj

Dum mia revizado de mia enskanita versio de "Esperanto – Sveda ordbok" de Paŭl Nylén mi iam kaj tiam renkontas cerbumigajn asertojn. Jen ekzemplo el lia vortaro kiun mi indikas per (???).

apog-i * stödja, stötta; (syn.: ripozigi (???), subporti, bazi, fundamenti, subteni, helpi, protekti);

Laŭ PIV:
*apog/i (tr)
1 Subteni k firmigi objekton per alia submetita:
2 Oblikve meti ion kontraŭ firme staranta objekto, kiu malhelpu ĝin fali:
3 (f) Uzi ion kiel pravigon aŭ motivigon por plua agado aŭ teoriado:
*ripoz/i (ntr): 1 Resti, nenion farante, por refreŝigi siajn fortojn:
ripozigi: Havigi al iu ripozon: tiu promenado ripozigos vian cerbon, viajn nervojn.

La vorto "ripozigi" ja povas esti interpreta metafore:
1 Ripozigi malsanulon, per apoga kuseno. (interpreto kiu apogas la aserton de PN)
2 Eŭfemisme minaci iun, ke tiu estos trafata de eterna ripozo, se tiu ne obeas. (interpreto, kiu malapogas la aserton de PN)
9 komentoj - La lastaj
Tjeri
Tjeri
Bona promenado ripozigos vian cerbon.
En tiu kazo, apogi tute ne estas sinonimo.
3 years ago.
KaGu:-}
KaGu:-}
Dankon por la komento.
Mi samopinias.
Mi fakte hezitas indiki, ke "ripozigi" estas sinonimo de "apogi" por iu ajn situacio, eĉ por helpi malsanulon havi pli ripozan / komfortan pozicion.
3 years ago.
rughulo
rughulo
Ĉiu vorto estas interpretebla kaj en kunteksto kaj konteksto. Veraj sinonimoj ne ekzistas en nia lingvo - sed multaj variantoj.
Tute eblas la repozo , kaj la apogeo anstataŭ apogo . La vortoj tre similas, sed ne estas sinonimaj. Foje necesas apogi sin sur prepozicioj por trankvila ripozo!
3 years ago.
Harri Laine
Harri Laine
La ideoj "apogi" kaj "ripozigi" povas esti iom parencaj. Se iu (aŭ io) ripozas, ĝi estas senmova. Pri homo, tio plej ofte signifas "por refreŝigi sin", ne ĉiam kaj ne nepre pri ĉio alia. Oni povas do pensi, ke meti ion sur apogilojn, ekzemple apogi ion sur subportiloj, sur stablo, aŭ per oblikvaj stangoj, esprimas ankaŭ la ideon ripozigi (senmovigi) ĝin sur aŭ helpe de io. Mi ne scias, ĉu pro tio oni povas nomi la vortojn sinonimoj, sed mi iel komprenas, kion Nylén volis diri.
3 years ago.
KaGu:-}
KaGu:-}
Dankon Harri! Vi donis tre probablan klarigon, kial PN indikis la vorton "ripozigi". Mi tamen opinias, ke ne temas pri sinonimo.

Ni ja memoru, ke PN kreis la vortaron antaŭ proksimume 60 jaroj, kaj li kompreneble estis influata de la lingva stilo inter svedojtiam, kiam li tradukis la esperantajn vortojn al la sveda. Tamen mia takso estas, ke la vortaro de PN jam hodiaŭ bone funkcias. Estas domaĝe, ke neniu kompetenta persono jam utiligis la vortaron por kreado de moderna vortaro Esperanto - Sveda laŭ la modelo de Ebbe Wilborg.
3 years ago.
Harri Laine
Harri Laine
Vi povas fari pensan provon per kelkaj frazoj PIV-aj:

apogi la kapon sur la mano
sin apogi sur ies brakoj


Tiuj ne estas tre malsamaj de

ripozigi la kapon sur la mano
sin ripozigi sur ies brakoj


aŭ, iom ŝanĝite sed eĉ pli klare ripozige:

ripozigi la kapon sur la kuseno
apogi la kapon sur la kuseno
3 years ago.
KaGu:-} has replied to Harri Laine
Dankon por la ekzemploj. Iom tro malfrue por pensado ;-). Mi faros pensadon morgaŭ matene post ŝovelado de neĝo. Probable la freŝa aero ripozigos mian cerbon ;-)
3 years ago.
rughulo
rughulo
Varingjen eterne ripozas - sen apogo de ia religio - ĉar li estis ateisto
3 years ago.
Pierre Levy has replied to rughulo
Tiu rimarko ripozas kaj apogiĝas sur ateisma konvinko.
Nun estas urĝe, ke mi iru apogi mian kapon sur kapkuseno
por ripozigi ĝin.
3 years ago.