Group: Lingva helpejo


apud la maro/maron


GiTa
By GiTa
October  2, 2011 - 11 komentoj - 888 vizitoj

Mi vidis ekzemplon de testo en edukado.net Tie troviĝas demando pri akuzativo. Lau la respondo oni devas skribi: Oni organizis ekskurson apud la maron.
Mi dirus: Oni organizis ekskurson al la maro au eble: Oni organizis ekskurson apud la maro.
11 komentoj - La lastaj
Tjeri
Tjeri
Mi marŝas apud li, mi iras apud lin. La uzo de akuzativo kun apud estas tute normala.
Se vi diras: oni organizis ekskurson apud la maro, la ekskurso, organizita apud la maro, povas okazi en montaro, ĉu ne?
Mi mem preferus diri: mi organizas ekskurson al la maro, aŭ (alisignife) apudmaran ekskurson.
5 years ago.
Michael Lennartz
Michael Lennartz
Oni povas rigardi la direkto-n kiel akuzativon, depende de la gramatika skolo, al kiu oni apartenas. Kutime oni definas: Akuzativo respondas je la demando "Kion? / Kiun?"

Movon laŭ direkto indikas same la finaĵo -n, sed tio ne estas akuzativo (kiel skribite, tio dependas de la gramatika skolo). Movon al direkto respondas la demando "Kien?"

La demando de GiTa enhavas du respondojn:

a) Kion signifas "al, apud, ĉe"?

al - indikas pure ununure direkton. Eĉ se la maro estas mil mejlojn for, mi povas iri (direkte) al la maro. (Parenteze: Ankaŭ "ĝis" indikas puran direkton (celon), neniam sekvas direkto-n)

ĉe - sen ia distanco, tuŝante

apud - je malgranda distanco, iom pli fora ol "ĉe", ne tuŝante

Do la ekskurso ne okazos al la maro, sed apud la maro (ne sur la bordo, sed eble cent metrojn for de la maro).

Ĉe la maro ĝi okazos sur la bordo, rekte apud la maro. Ni malsekiĝos.

b) indiki la direkton per la finaĵo "-n":

Ekskurso apud la maron: Oni organizos ekskurson, kiu komenciĝos en la montoj kaj oni iros al la maro. La ekskurso finiĝos cent metrojn for de la maro.

Ekskurso apud la maro: Ni komencos la ekskurson ie apud la maro (eble cent metrojn for) kaj iros apud la maro (do dudek ĝis ducent metrojn for de la maro). Ni ne malsekiĝos.

---

Tjeri opinias alian fenomenon: Onidire en E-to la vortordo estas libera, sed tio estas eraro. Libera estas la sinsekvo de la unuopaj logikaj partoj de la frazo. Ne liberaj estas la pozicio de "ne", de prepozicioj (ili staras antau la koncerna vorto), kaj kutime adjektivoj staras antaŭ au post la respektivaj substantivoj. Ĝenerale la logiko, aŭ kiel Z. nomis tion, la klareco de la penso, postulas difinitan vortordon.

Apud la maro mi organizis ekskurson. = (kutime signifas) Mi troviĝis apud la maro, kiam mi organizis la ekskurson.

Mi organizis ekskurson apud la maro. = Mi organizis ekskurson, kiu okazos apud la maro.

Mi organizis ekskurson apud la maron. = Mi organizis ekskurson, kiu irigos nin al la maro.

La lasta frazo ne perdas sian sencon, kiam mi skribas: Apud la maron mi organizis la ekskurson., ĉar laŭ la senco de la frazparto kun ka direkto-n logike devas respondi al "la ekskurson". Fakte ĝi estas respondo je la demando: Kien vi organizis la ekskurson?

En tiuj ekzemploj la loko-difino "apud la maro" dependas de la kunteksto.
5 years ago. Edited 5 years ago.
Ed Robertson
Ed Robertson
"Apud la maro" kaj "apud la maron" estas ambaŭ akcepteblaj. En normala dialogo oni ellasas aferojn kiuj estas subkomprenataj.

Jes, la (vojaĝo de la) ekskurso estis apud la maron, kaj la eksurso estis (vojaĝo kies celo estis) apud la maro.

NE IMAGU ERAROJN KIE ILI NE EKZISTAS

Esperanto estas simpla lingvo.
5 years ago.
GiTa has replied to Ed Robertson
Ed, kial vi skribas kun GRANDAJ literoj? Mi "ne imagas eraron kie ili ne ekzistas". Plej ofte oni uzas movan verbon por esprimi direkton, ekzemple "salti sur la tablon". La frazo "oni organizis ekskurson apud maron" estas nekutima.
Ed, mi opinias, ke mi rajtas fari demandojn al ĉi tiu grupo, eĉ se vi pensas, ke miaj demandoj estas stultaj aŭ senbezonaj. Espereble vi kutime ne "forpelas" homojn, lernantojn, kiuj faras demandojn al vi. Troviĝas jam tro multaj malafablaj esperantistoj. Miaj spertoj celas precipe la reton. Sed dank´al la reto mi eklernis Esperanton, kaj pro tio mi havas la plej multajn esperanto-kontaktojn tie.
5 years ago.
Ed Robertson has replied to GiTa
Pardonu GiTa, mi ne intencis ke mia grandlitera eksklamo direktiĝu al vi persone. Kompreneble viaj demandoj estas validaj. Temis pli pri ĝenerala pledo ke oni ne estu tro rapida imagi al si, ke se ekzistas du eblecoj, eĉ se tiuj du eblecoj temas pri akuzativo aŭ ne, tio ne nepre signifas, ke unu el la eblecoj estas ĝusta kaj unu malĝusta. Fakte mia vera intenco estis kontraŭi tro oftan malafablecon, pri kiu vi certe ne kulpas, nome preteco kritiki alies Esperanton, kaj trovi erarojn kie estas disputinde ĉu fakte temas pri eraro.
5 years ago.
Pierre Levy
Pierre Levy
En "oni organizis ekskurson apud maron", la akuzativo de "maron" nepre indikas direkton de movo, kiun ne esprimas la verbo "organizis". "Apud maron" nur povas esti komplemento de la substantivo ekskurso. Mi komprenas, ke la ekskurso konsistas el vojaĝo aŭ promenado de loko relative malproksima de la maro al loko situanta apud la maro, sed la ekskurso ne atingos la maron mem.
Foje, dum turismado en Majorko, mi partoprenis aŭtobusan ekskurson ĉirkaŭ la insulo. Dum la vojaĝo ni preskaŭ konstante vidis la marbordon, tamen ni neniam atingis la marbordon ĝis nia reveno al la hotelo. Nia ekskurso do ne estis organizita "apud la maron", sed "apud la maro".
5 years ago.
GiTa
GiTa
Dankon, Pierre. Mi bone komprenas. Sed mi opinias, ke testo devas esti tre klara.
5 years ago.
rughulo
rughulo
Kia demando - tia respondo.

Simple vi forgesis skribi la demandon .

Tial ankaŭ ne klaras la respondo
5 years ago.
GiTa
GiTa
La nomo de la grupo indikas la demandon: Kiel oni diras....
5 years ago.
rughulo
rughulo
vi demandis la akuzativon - sed ne faris demandon pri la maro

la demando eble tekstis: Kien kondukis la ekskurso al la maro?

Alia demando estus: kie oni ekskursis?

Kial oni ekskursas ? Kiom ofte oni ekskursis? ktp. ktp.


Kia demando- tia respondo
5 years ago.
rughulo
rughulo
francino demandis min : ĉu vi jam iris maron`

sed maro ne estas maron`

Nepre oni prononcu la akcenton!
5 years ago.